الحقنى ضربنى

لقيته واقف على الباب بيقول لي بحبك...قربني الحقنى ضربنى 18855_107663552579045_100000062015874_210002_5633814_a

وعيل من عيالي واقف وراه، بيقول لي ألحقني...ضربني!!
قلت له من على الباب، ارجع ومتجيش تاني
لو كنت بجد بتحبني كنت احترمت عيالي عشاني
الخلق عيال ربنا زي ما العلماء قالوا
لأنه بيحافظ عليهم وبيصرف عليهم من ماله
يبقى تهين حبايبه، وتقول له في صلاتك "أرضى عني"؟!
وحبيبه يقول له "خد لي حقي من اللي أهانني"!
عارف يا صاحبي عبادتك مانفعتكش ليه؟
لأنك عبدته وأنت مش متعلق بيه
لو كنت متعلق بيه، كان هيبان عليك
لا تجيب سيرة حد بالغلط ولا تأذي اللي حواليك
سألت نفسك ليه النبي كان اسمه الصادق الأمين؟
هتلاقي كل كلامه ان الأخلاق هي الدين
عشان يتمم مكارم الأخلاق كان الغرض من بعثته
وكان دايما يكررها في كلامه وكانت باينة في وصيته
ده الصلاة انضباط، وأدب، وتواضع
مش آكل حق غيري وأروح اصلي في الجامع!
حتى العقيدة اننا نعرف صفات ربنا
عشان نتعلمها منه ونعالم بيها بعضنا
لو كنت مؤمن بجد وعقيدتك سليمة
كان بان سلامة صدرك وأخلاقك الكريمة
مش لو حد جه جنبك تتشعنن وتزعق
وتبقى أيدك طويلة وتتخانق وتهزأ
وانت يا ستي شكلك مخيف
بعينيكي المبرأة واسلوبك العنيف
لو كنتي مؤمنة بجد انطقي بخير أو امسكي لسانك
ولو بتعظمي ربنا بجد اكرمي ضيوفك واوعي تأذي جيرانك
وانت قال لك في الدنيا لو غشيت في مهنتك
فلوسك هتبقى حرام ومش هيستجيب دعوتك
وبعد الموت هنتدفن في التراب
النميمة والكذب هما اسباب العذاب
واوعى تاخد حق حد، أو تتريق عليه وتغلس
مهما صليت أو صمت، يوم القيامة هتيجي مفلس
وربك قال لك يوم القيامة هساعدك ومش هسيبك
لأنك كنت بتساعد عيالي وبتصرف عليهم من جيبك
شفت بقى يا صاحبي ليه النبي كان اسمه الصادق الأمين؟
لأن كل كلامه ان الأخلاق هي الدين