شيش طاوووك مع الارز بالخلط

بسم الله
** تتبيلتنا :

(( بصلة + 5 فصوص ثوم + عصير ليمونة + 3/4 كوب لبن رايب او علبة زبادى وبفضل اللبن الرايب عن تجربة بيكون وهمى + 3 م ك كاتشب + 1 م ص ورشستر صوص ولو مش متوفر مش مشكلة لكنه بيكون مميز اوى لأى شوى فراخ واحلى من الصويا صوص + 2 م ك زيت زيتون او ذرة وانا بفضل طعم زيت الذرة + بهاراتنا وهى :

1 م ص ملح
1 م ص فلفل اسود
1 م ص بهارات فراخ
1 م ص بابريكا
1 م ص كسبرة ناشفة مطحونة
1/2 م ص قرفة مطحونة
1/2 م ص زنجبيل بودر
1 م ص زعتر ناشف
1/2 م ص نعناع ناشف
3 فصوص حبهان
ورقة لورا ))

كل ماسبق يضرب فى الخلاط جيدا ,, ويحجز منه مقدار صغير حوالى ربع كوب يدهن به اثناء الشوى من وقت لآخر ----------> التكة دى اخدتها من الجميلة مرسم وبشكرها جدا عليها ,, اضافاتها دايما مميزة

وهذا شكل التتبيلة

** الفراخ :

انا بستخدم الصدور لانى بكسل اخلى الوراك وكمان مش متوفر عندى كمية وراك كبيرة كده ,, بس بستخدم الصدور
بشرط انها تكون تخينة اوى ومكلبظة زى اللى هتشوفوها عشان ماتنشفش فى الشوى وتقطع مكعبات كبيرة يعنى الحتة تكون تملا العين

انا عملت كيلو الا حاجة بسيطة تقريبا 850 جرام

-- طبعا بتتبل الفراخ بعد تقطيعها ومرورها بمراحل التنضيف والملح والخل والليمون والذى منه ,, وتنقع فى التتبيلة مالايقل عن ساعتين ويستحسن ان يزيد

-- نيجى بقى لوقت المرح واكتر حاجة بحبها فى الوصفة دى هى اللعب بالاسياخ ,, طماطم وبصل وفلفل الوان مكعبات ونرص بالتبادل مع الفراخ فى الاسياخ ونحرص انه عدد قطع الفراخ مايزيدش عن 4 فى السيخ الواحد عشان ماينتنيش من تقل الحمل عليه
طبعا بنوسع المسافات بين الاسياخ شوية مش زى الصورة ,, انا هنا بس كنت مجمعاهم عشان يتصوروا عشان محدش يزعل ,,

-- طبعا هنكون سخنا الفرن كويس اوىىىىىىىىىىىىىىىىىى ,, وهندفع بالاسياخ الى الفرن بدون تغطية الصينية ,, وهنبص عليها بقى من وقت للتانى ونلف الصينية ولما تبدا تتشرب التتبيلة اللى عليها ندهنها على خفيف من التتبيلة اللى حجزناها

هتاخد من 30-40 دقيقة مش اكتر من كده ,, ولما تستوى هنفتح الشواية عشان نديها اللون الجميل اللى هتكون فعلا اكتسبته ولكن انا بحب تحميرة الشواية ,,

واكيد مش هتلاقوا احلى من الارز بالخضار الجميل جدا والشيبسى والطحينة عشان تستمتعوا بأحلى وجبة ,,
معلش ماصورتش الارز بالخضار لانى كالعادة بكون مستعجلة جدا فى الاخر ,, انا صورت طبق الشيش عشان خاطركم بس
واللى حابب يعرف الارز هبقى اقوله ان شاء الله ,,

اكيد اعرفها هل طبخة ماما بتعرفها
وبألك يسلمو يا احلى شهد في العالم

ما شاء الله

تبدو شهيه جدا يا شهد

والشرح بسيط وواضح

إن شاء الله أقوم بتجربتها قريبا

وموضوع يستحق التثبيت بالفعل

يسلموووووووووو ايدكى ياجمييييييييل

شيش طاوووك مع الارز بالخلط Je3lon0e

miley كتب:: اكيد اعرفها هل طبخة ماما بتعرفها
وبألك يسلمو يا احلى شهد في العالم

ربنا يخلي مامتك يا مايلي

وكل امهتنا

الفضل ليهم فاننا بنعرف نعمل الاكل وكل حاجه

ربنا يحفظ كل ام يارب

وميرسي علي مرورك يا احلي مايلي

LimoMan كتب:: ما شاء الله

تبدو شهيه جدا يا شهد

والشرح بسيط وواضح

إن شاء الله أقوم بتجربتها قريبا

وموضوع يستحق التثبيت بالفعل

ميرسي ليك يا حسام

شكلك شاطر يا حسام في المطبخ

ولا هنشم ريحه شياط

هههههههه

وميرسي ليك علي التثبيت

//الوردة البيضاء// كتب:: يسلموووووووووو ايدكى ياجمييييييييل

ميرسي يا قمر علي مرورك

والله واحشني

» الارز البسمتى على طريقة تكا
» الارز على الطيرقة الصينية